أحلى بنوتة
___________________
أحلى بنوتة حكايتنا
شفتها ماشية ف حارتنا
من عيونها البدر طل
والخدود ياسمين وفل
نفسى الاقى معاها حل
ترسم الأفراح ف بيتنا
أحلى بنوتة حكايتنا
____________________
أحلى بنت ونورها باين
ماشى يضحك ف المداين
والمساكن والشوارع
والنوادى والجناين
خطوها ألحان جيتار
شد قلبى
شفت فيه أجمل نهار
صنع ربى
والرموش قالت كلام
جايه أزورك ف المنام
نبتدى قصة غرام
بعد حبى
وابتديت مشوار جديد
حلمى أصبح مش بعيد
والأغاني الحلوة هلت
وابتسامة أحلى عيد
والتقينا
وابتدينا
لما أشواقنا خدتنا
أحلى بنوتة حكايتنا
_____________________
أحلى بنت وياما ياما
ف القلوب سهم وعلامة
شفت م العشاق كتير
والقصور لابسة الحرير
واما ردت هى قالت
ف الفؤاد ساكن أمير
اللى حسسنى بكيانى
اللى خدنى من زمانى
واللى حالف يبنى بيتنا
صدق مش حبة أمانى
السعادة مش فلوس
السعادة رضا النفوس
مش تبيع الحب لحظة
أو على الاحساس تدوس
عمرنا محسوب تمام
بالثواني والساعات
ليه يضيع وسط الملام
نبكى دايما ع اللى فات
ننسى فرحة ف يوم نادتنا
أحلى بنوتة حكايتنا
_____________________
شعر /محمد الشرقاوى
ليست هناك تعليقات:
إرسال تعليق