مش مستحيل
__________________________
ياللا يا غالية وانت يا غالي
نرسم حلم جميل بيلالي
مصر بلدنا غنية قوية
لو بطلنا نقول وانا مالي
اعمل خير وما تستناش
تسمع شكر وتقبض كاش
بكرة وليدك ما هيرضاش
عن فعلك فى الوقت الحالي
بس بلاش كلمة وانا مالي
__________________________
ربنا وصى بفعل الخير
علشان يفضل بينا أمان
ويا الإنس كمان والطير
نلقى الدنيا بقت بستان
فيه الرضا والحب بذور
تطرح دايما أحلى زهور
ترسم لينا طريق النور
تسكن مصر الدور العالي
بس بلاش كلمة وانا مالي
__________________________
علم إبنك معنى الدين
وبلاش يبقى جبان كداب
يوم الحشر فرح وأنين
بعد ما نقرا أهم كتاب
خليك دايما عنده مثال
طيبة وصدق وكل جمال
يشكر ربنا ع الأحوال
يبنى ويصنع كل معالي
بس بلاش كلمة وانا مالي
__________________________
شايف الظلم وساكت ليه
قول الحق بكل صراحة
فين العدل وفين أراضيه
فى الإنعاش مستنى جراحة
لو شعاراتنا هتبقى سكوت
نلقى حياتنا ملاها الموت
عشت غضنفر أو كتكوت
مش هتزيد فى العمر ليالي
بس بلاش كلمة وانا مالي
__________________________
ماشى فى شارع شفت ضعيف
ظالم واقف يضرب فيه
واللا جعان وف إيده رغيف
سرقه عشان الفقر كاويه
لو عديت ومشيت علطول
تبقى اخترت طريق مجهول
بكرة تقف حيران مسئول
علشان قلت هريح بالي
بس بلاش كلمة وانا مالي
__________________________
شايف حد مخاصم حد
ويوم ورا يوم الهجر يزيد
قوم واتكلم جد الجد
واعمل جو سعادة وعيد
ليه تتنازل كده عن دورك
مسلم يعنى تولع نورك
امتى يبان صوتك وظهورك
قول يا فصيح رأيك فى سؤالي
بس بلاش كلمة وانا مالي
__________________________
شاب وقاعد فى مواصلات
يسمع غنوة ويلعب لعبة
وجنبه كتير واقفين ستات
نظرة عينهم ارحم حبة
ترضى لأمك لحظة هوان
واللا أبوك يا عديم إنسان
ياللا نقول له بذوق غلطان
مش دايمة لك ولا دايمة لي
بس بلاش كلمة وانا مالي
__________________________
حاجة بتغلا كل يومين
وانت تعبت من الحسابات
ابعد عنها يدوب شهرين
مش هتكون ويا الأموات
أشرف خلق الله يا ولاد
كان بيصوم لو قل الزاد
وفى رمضان فتوحات وجهاد
مش فى خيالك ولا فى خيالي
بس بلاش كلمة وانا مالي
__________________________
شعر/ محمد الشرقاوى
ليست هناك تعليقات:
إرسال تعليق